Thesaurus Exemplorum
Medii Aevi

Item ad idem. Refert Cesarius quod fuit quedam dives matrona que habens peccata enormia nolebat alicui confiteri, licet de eis multum doleret. Cum nutrisset quendam clericum et ille esset factus sacerdos, ac viveret de bonis sui hospicii, ex hoc securitate assumpta fuit illi confessa. Cumque ille sollicitaret eam ad actum immundum et illa perfecte rennueret, ille turbatus revelando confessionem ejus eam diffamare decrevit. Cumque per vicos et plateas ipse narraret mala illius, Deus qui adjutor est in tribulatione , convertit suam cogitationem et credens dicere peccata et mala domine, dicebat omnes ejus perfectiones et bonitates. Cumque gentes commendassent sacerdotem eo quod tot bona diceret de domina, ipsa gracias Deo referens cum magna devotione plus Deo se dedit, sed sacerdos subito percussus a fulgure exspiravit.