Thesaurus Exemplorum
Medii Aevi

Secundo est associativa cum nociva. Fingitur fabula quod lupus semel considerando mala que fecerat, penitentiam voluit facere ; et ideo accessit ad montana mire altitudinis, et posuit se in spelunca. Cumque audivissent oves et arietes ejus honestam conversationem, in quodam festo venerunt ad eum consolandum. Cumque exortati fuissent eum ad perseverandam penitentiam, lupus petebat veniam de maleficiis perpetratis. Et cum oves et arietes pepercissent et vellent recedere a se, ipse posuit se in loco in quo singulatim transeuntes videret ; et dum transiret unus pinguis aries, cepit eum et clamavit :" Non miremini nec decipiamini si pro prandio meo retineo istum arietem, quia tantum consuevi quod vix possum -[f° 46d]- me abstinere et ulterius non didici petere elemosinas. " Per lupum intelligitur principes et barones hujus mundi, qui semper consueverunt nutriri et vacare depredationibus; et ideo interdum fingunt quandam bonitatem et restitutionem suorum forefactorum, et sub illo pallio possunt plura mala facere et extorquere plures rapinas.