Thesaurus Exemplorum
Medii Aevi

Quarto est fatuitatis indicium. refert Jacobus de Vitriaco quod fuit quidam nobilis qui habuit filiam valde castam, et que se multum trahebat a coreis et ab aliis lasciviis mundanis. Cumque increpata fuisset a patre quia gaudiis non adherebat et vanitatibus mundi, respondit illa: "Pater fatuissimum est coreas ducere in hac vita et hoc ostendo per multa exempla. " Primum fuit tale: princeps habens vestem pulcram utitur ea vel dat eam alteri principi, non dat histrioni donec sit antiqua. Princeps -[f° 62]- est Deus, vestis est conversatio, histrio est mundus et ideo non debeo dare florem juventutis mee histrioni. Secunda ratio fuit hec: qui perdidit castrum pulcerrimum et hereditatem infiniti laboris, dum actu eam videt gaudere non potest, et quia nos perdidimus hereditatem celestem et ideo et ceteraI Tercia ratio fuit ista: incarceratus et victus dum moriatur inter inimicos letari non potest, et quia sumus vincti diversis peccatis et inter inimicos ideo et cetera…