Thesaurus Exemplorum
Medii Aevi

Item ad idem. Legitur in Libro de Vita et Perfectione Fratrum Predicatorum quod cum quidam frater Predicatorum exercens officium predicationis crucis, clericum divitem et deliciosum in voluptatibus et honoribus cruce signavit, qui volens confiteri consuluit ut differret usque ad crastinum, quia esset in ecclesia ubi erat habitatio sua, qui acquiescens. Dum illa nocte lectum intraret dyabolus ei apparuit dicens: "Quid est hoc quod fecisti ? Ego omnibus diebus vite tue tibi servivi providens tibi in diviciis et honoribus mundanis, et tu me spernes nunc et vis me totaliter dimittere. Sed certe non sic effugias manus meas. ” Tunc clericus timens de bursa sua subito signum crucis extraxit, et super ventrem suum ponens, ait: "Certe in me potestatem habere non poteris, quia ecce scutum et arma defensionis mee contra te extendo, scilicet sanctissimum signum crucis. ” Quo viso dyabolus statim disparuit et ipse liberatus quievit.