Thesaurus Exemplorum
Medii Aevi

Item. Legatus quidam cum magna comitiva magnorum clericorum predicabat crucem; et cum non posset per se nec per socios nec per religiosos fratres facere, petiit si esset aliquis qui possit vel sciret proponere verbum Dei. Et cum representaretur quidam sacerdos simplicissime litterature, qui parochianis suis predicabat de legendis sanctorum et reputabat eum populus predicatorem egregium, rogatus a legato et coactus per virtutem sancte obedientie surrexit violenter, et sine auctoritate aliqua Sacre Scripture populum alloquitur in hunc modum: "Estne aliquis hic de villa mea ?"Surrexerunt multi dicentes: "Ita domine, nos sumus de loco vestro. "Tunc sacerdos proposuit eis talem questionem: "Quero a vobis quid est majoris laboris vel ventilare bladum vel flagellare ?"responderunt: "Domine, flagellare nam unus homo ventilat una die quantum decem flagellarent. "Tunc sacerdos: "Verum est, nam isti clerici scientes Sacram Scripturam et habentes maximam fortitudinem flagellaverunt vos per totum diem Sacris Scripturis et Verbo Dei, et quia sciunt me esse debilem in sciencia elegerunt me ad ventilandum quia nescio flagellare sicut ipsi, et quia ventilare nihil aliud est nisi mittere granum ad unam partem et paleam ad aliam; idcirco adjuro vos per Passionem Crucifixi et per effusionem sanguinis ejus quem effudit in cruce propter peccata solvenda, ut omnes qui voluerint tanquam triticum electum reponi in Paradisio in horreo Dei veniant celeriter et accipiant crucis signum; palee vero vadant et succendantur in ignem eternum. "