Thesaurus Exemplorum
Medii Aevi

Item. Refert beatus Bernardus quod vidit quinque viros mirabili fatuitate laborantes. Primus masticando arenam maris totam volebat devorare. Secundus stabat super furnum plenum igne sulphureo et totum fumum suis naribus attrahere cupiebat. Tercius stabat super fornacem et omnes scintillas ex ea procedentes sibi incorporare affectabat. Quartus super pynaculum templi residens omnes flatus ventorum aperto ore quantum poterat ad se trahebat. Quintus vero rodendo carnes et omnia membra sua cum dentibus lacerabat. Requirendo ergo causam tante stulticie, a singulis unam reperio causam scilicet validissimam famem.

Primus est falsus mercator qui in ponderibus et mensuris semper fraudem committit. Secundus est latro qui in itineribus et in viis cum fetida societate ceteros depredantur. Tercius est usurarius. Quartus symoniacus. Quintus crudelis qui pauperibus non compatitur, ymmo eos persequitur, nec satisfacere curat in vita; ideo membra id est sui posteri devorantur per eum.