Thesaurus Exemplorum
Medii Aevi

Secundo elemosina est Dei placativa.

Refert Johannes Elemosinarius quod cum pauperes starent ad solem et referrent quis libenter faceret eis bonum, in hoc concordaverunt omnes quod de uno divite pessimo nunquam elemosinam poterant extorquere. Tunc unus affirmavit quod omnino elemosinam haberet ab eo, alioquin solveret talem penam. Qui vadens ad ejus hospitium et importune ibi clamaret, ille tedio victus projecit ei unum panem siliginosum. Qui eum recipiens letus ad socios est reversus. Tandem iste dives infirmatur et in progressu infirmitatis ad divinum judicium rapitur. Demones adveniunt, accusationes inducunt et leti audacter peccata probant; ex parte opposita videt dolentes angelos nec bonum aliquid habent quod ponant in alia parte statere. Finaliter venit unus qui projecit ibi panem siliginis quem pauperi dederat et quia peccata preponderabant, dictum est ei: "revertere et augmenta hanc siliginem si vis salvari. Qui rediens, maximus elemosinarius est effectus.