Thesaurus Exemplorum
Medii Aevi

Item ad idem -[f° 83]- . Quidam prepositus devotionem habens in Nativitate Christi omnes advenientes pascebat et multis donabat vestes. Dum autem in quodam festo esset in mensa, audivit fletum unius pauperis stantis in porta, et surgens introduxit eum. Et quia erat totus lutosus, accepta aqua calida, dum involvisset eum suo pallio voluit lavare pedes ejus antequam cum aliis poneretur ad mensam. Et cum accepisset pedes, vidit eos perforatos ad modum Crucifixi. Cum etiam aspexisset manus idem vidit; et cum vocasset familiares suos, statim ille evanuit; et in pelvi eneo in quo aqua fuerat parata ad ablutionem pedum, indelibilis scriptura reperta est hujus tenoris: "Maledictus a Deo excelso est ille qui in magnis festivitatibus induit scutiferos servientes vanitatibus mundi, hystrionibus dat cibum pecunias et vestes contemptis pauperibus quorum sunt; et benedictus a dextera Dei est ille cum tota sua progenie qui pauperibus plus quam divitibus intendit servire. "