Thesaurus Exemplorum
Medii Aevi

Item ad. idem. Fuit quidam princeps latronum qui in heremo veniens ad domum paupercule mulieris requirit quare in sabbatis jejunarent parvuline filie sue, respondit mater: "Domine, audivi a quodam sancto viro quicunque jejunat sabbatum ad honorem beate Virginis nunquam moritur sine plena confessione. ”

Tunc latro: "Et ego voveo beate Virgini quod illo die in perpetuum jejunabo. "

Post multos annos continuatis semper jejuniis ut promiserat, latro capitur et sine dilatione decapitatus. Tunc caput precisum a corpore, incepit clamare et continue dicere: "Confessio! Confessio!” Tunc stupefacti capientes ad villam pro sacerdote miserunt. Qui veniens caput univit corpori et statim est integratum ei. Tunc latro: "Hoc bonum ad reverentiam Virginis feci in vita. Et dum facta decapitatione dyaboli vellent rapere meum spiritum, affuit beata Virgo, que animam meam non permisit exire de meo corpore quousque contritus sim et plene confessus. ”

Et confessis omnibus peccatis, postulatis devote suffragiis, mortuus est in pace.