Thesaurus Exemplorum
Medii Aevi

Item. Refert Hieronimus quod dum quidam sanctus diu heremiticam vitam duxisset, oravit Deum ut revelaret sibi cui esset similis in vita eterna. Cui apparens angelus ait quod esset similis cuidam symphoniaco qui morabatur in proximo vico. Ad quem pergens et actus ejus inquirens, ille dixit: "Sepe fui frater latronum et nullius bonifactor, nisi quod virginem quandam raptam a sociis a corruptione servavi, et servatam cuidam honeste mulieri domui proprie restitui. Aliud bonum recordor me fecisse, ut motus misericordia cuidam mulieri erranti in heremo trecentos solidos dedi pro redemptione viri sui et filiorum, qui in carcere tenebantur. ” Quem ducens ad heremum, dum post modicum fuisset mortuus vidit quod misericordia elevabat eum ad celum.

Secundo oravit idem heremita cui in gloria eterna esset similis. Responsum est sibi quod primario civitatis. Ad quem pergens audivit ab eo quod operibus misericordie quantum poterat insistebat et addidit: "Uxorem pulcram accepi et habitis filiis, per triginta annos a conjugabili concubitu abstinui. ” Quem etiam ducens ad heremum, dum post paululum fuisset mortuus, vidit quod misericordia elevabat animam ejus ad celum.

Tercio oravit ut sciret cui in gloria esset similis, et responsum est ei quod cuidam mercatori qui habebat naves diviciis et mercimoniis ornatas . Ad quem pergens ex parte Dei invitavit eum ad penitentiam et ad susceptionem beneficiorum misericordie Dei. Qui statim acquiescens, venditis omnibus et datis pauperibus, secutus est eum. Et dum moreretur, vidit quod misericordia Dei elevabat eum ad celum.

Tunc ultimo cum sanctus heremita appropinquaret morti, convocato sacerdote cum multis, ait: "Nemo sive fur, sive meretrix, sive mercator, sive publicanus, debet contemni, quia de omnibus istis Deus elegit sibi amicos et misericordia Dei in motu oculi eos sanctos facit et bonos. ” Et cum narrasset omnia, dormivit in pace.