Thesaurus Exemplorum
Medii Aevi

Quinto est damnationis liberativa.

Legitur in Vitas Patrum quod quidam habens sororem carnalem meretricem ad eam in Egyptum accessit, eo quod esset multis causa damnationis. Que cum audiret eum venire occurrit ei, relictis omnibus amatoribus suis, nudata capite et discalciata volens amplexari eum requirens si misericordia Dei locum haberet in ea. Tunc ille: "Soror, sic quantum castrum est magis munitum et rebelle tanto est gaudium majus in captione. Quanto fera est magis silvestris, tanto de ea fit majus festum in curia regis. Quanto morbus est gravior et desperatior, tanto medicus est majus gaudens si per eum curatus. Quanto filius a patre recessit longius, tanto letantius recipit redeuntem. Quanto filius magis profunde in luto cecidit, tanto citius mater succurrit. Et ideo veni et sequere me, sed prius vade velare caput tuum et calciare pedes tuos. ” Que redire nolens ne inveniret occasionem peccati, ne male homines edificarentur , misit eam per aliam viam. Et cum reperisset eam mortuam et pedes ejus plenos spinis, et fleret juxta eam, vidit lucem mirabilem et revelatum est ei quod misericordia presentasset ejus penitentiam coram Deo; et quod Deus, propter fervorem quem habuerat, acceptaverat et remiserat sibi plenarie mala sua.