Thesaurus Exemplorum
Medii Aevi

Sexto est indulgencie aportativa.

Legitur in Vitas Patrum quod quidam heremita, impugnatus a peccato immundicie, venit ad quandam civitatem Egypti, et ibi videns filiam sacerdotis ydolorum adamavit eam, et petivit a patre ut eam sibi daret uxorem. Qui requirens consilium demonis loquentis in ydolo, dixit quod nullo modo daret eam sibi nisi baptismum et Deum negaret. Qui cum fecisset sacerdos vidit columbam de ore ejus egredientem. Et cum adhuc nollet eam sibi dare nisi iterum habita collocutione demonis, cum interrogasset demonem, respondit: "Deus Christianorum summe misericors est, et ipsi negant eum, ipse autem non negat eos; sed in omni tribulatione et in omni dolore semper eis assistit. Et ideo licet negaverint eum consulo ut nullo modo des eam sibi. ”

Quod ille audiens compunctus et reversus ad cor suum rediit ad heremum, et confessus est cuidam seni. Qui injungens sibi hebdomadam jejuniorum, dum illam complevisset vidit columbam super eum volitantem. Cum autem secundam injunxisset, appropinquavit columba, sed in tercia os ejus intravit.