Thesaurus Exemplorum
Medii Aevi

Item ad idem. Fuit quidam sacerdos in Basconia qui post Apostolos summam devotionem habebat ad mortuos. Et ideo movebat populum sue parrochie in die dominico ut in die lune interessent absolutioni defunctorum. Cum autem hoc per aliquas septimanas tenuisset et magna multitudo ibi veniret, dum quadam die missa celebrata, exuta casula, intrasset cimiterium cum aspersorio aquam largiens benedictam, aperta sunt omnia sepulcra et corpora defunctorum extensis manibus aquam benedictam recipiebant. Cum autem hoc miraculum denunciatum fuisset episcopo, et ille ecclesiastica fide probasset de die lune et non de alio die septimane. Revelatum est sibi a Spiritu Sancto quod illa dies erat fidelibus animabus dedicanda.

Et ideo in illa provincia statutum fuit et nunc tenetur per totum mundum ut in die lune cimiterium absolvatur et misse pro mortuis celebrentur.