Thesaurus Exemplorum
Medii Aevi

Secundo est penarum accumulativa.

Unde narrat Umbertus quod quidam abbas moriens rogabat monachos ut pro eo suum nepotem eligerent. Quod cum fecissent et abbatiam pacifice possideret, deambulabat per ortum in quo erat fons pulcerrimus, unde audivit voces lacrimabilis gemitus. Cum igitur sub astrictione Passionis Christi requireret ut intimaret quid hoc esset, respondit: "Ego sum anima tui avunculi qui inextinguibili ardore in hac aqua crucior, quia rogavi ut tu mihi succederes in hac dignitate. Nam summe Deo est odibile quod onus angelis importabile super humeros pueri ponatur, quod castrum super baculum arundineum fundatur, et quando clericus propter parentes Christum dimittit qui vere sunt inimici. Nam tunc Judas est et re et nomine qui propter parentum amiciciam dissipat ea que sunt sanguinis Jhesu Christi Crucifixi. ” Tunc ille hoc audiens et stupens dixit: "Non videtur mihi simile quod ardeas in hoc fonte . ” Tunc ad mandatum mortui candelabrum cupreum in fonte projicitur, in instanti liquescit. Quod videns abbas dimisit abbatiam et sic illi gemitus cessaverunt.