Thesaurus Exemplorum
Medii Aevi

Ornatus vanus multa mala causat in nobis.

Primo est meritorum privativus.

Legitur quod fuit quidam sanctus qui dum oraret semel in extasi positus vidit celum apertum. Et dum staret cum mirabili gaudio, eo quod multi per illam aperturam intrarent, vidit venire duos dracones crudelissimos, et illi extendentes unum maximum rethe et ponentes coram illa apertura prohibebant omnes volentes intrare ne possent. Cum ille tunc fleret a Deo ut demonstraret sibi quod erat illud rethe et qui dracones, affuit ei angelus dicens: "Draco unus est immundicia, draco secundus est vana gloria; sed rethe est lascivus et vanus ornatus mulierum; et iste elevatur per inanem gloriam et per immundiciam, et tantam jacturam faciunt ut aperturam quam Christus suo sanguine fecit in celo claudant, ne beneficia celestia possint ascendere et anime non possint intrare ad gloriam beatorum. Et dico tibi quod forte tot damnantur per illicitas mulierum allectationes et per vanos ornatus quam per magnam partem demonum infernalium. "