Thesaurus Exemplorum
Medii Aevi

Item. Legitur in Vitas Patrum quod abbas Serapion vadens in Egyptum, vidit ibi unam meretricem variis ornamentis coopertam ante hostium ad capiendas animas preparatam. Ad quam senex: "In nocte volo venire ad te et ideo expecta me aliquantulum, quia habeo breviter orare horas meas. ” Cumque incepisset dicere psalterium et multos psalmos diceret, incipiebat rogare Deum ut converteret illam. Quod illa cognoscens etiam juxta eum cepit orare, et cum meretrix cognosceret quod non propter peccatum ad eam venerat sed pro salute sua, provoluta cum lacrimis ad ejus pedes, requirebat si misericordia Dei penitentiam faciendo locum haberet in ea. Cui sanctus: "Filia sic, sed obsecro attende quot et quanta expedisti et etiam temporaliter ad pascendum oculos alienorum et quomodo anima tua moriebatur fame, attende quomodo gaudebas in vano ornatu qui est vestis damnatorum et quomodo a vilissimis creaturis recipiebas pulcritudinem tuam. ” Tunc ducens eam ad conventum virginum cum magna sanctitate Creatori suo servivit.