Thesaurus Exemplorum
Medii Aevi

Secundo demones fugant.

Unde legitur ibi supra quod quidam peccator religionem intravit et post tempus infirmatus mortuus est. Cum autem fratres ante lectum suum psalmos dicerent, abbas vidit quatuor demones deteriores consurgentes a quatuor pedibus lecti. Primus dixit hunc versum:” Dixit injustus ut non delinquat et cetera. ” Secundus dixit:” Quam dolose egit et cetera. ” Tercius dixit:” Verba oris ejus et cetera. ” Quartus clamando dixit:” Iniquitatem meditatus est et cetera. "

Econtra quatuor angeli ex adverso contra quatuor demones exsurrexerunt et quatuor versus sequentes dixerunt. Primus dixit: "Domine in celo misericordia tua. ” Secundus dixit:” Homines et jumenta et cetera. ” Tercius dixit: "Inebriabuntur ab et cetera. ” Quartus dixit: “ Domine apud te est fons vite Jhesus Christus. ” Quo audito demones confusi recesserunt dicentes: "Nihil hic facimus. "