Thesaurus Exemplorum
Medii Aevi

Item ad idem. Legitur in libro de Septem Donis Spiritus Sancti quod quidam gravissima infirmitate correptus rogabat Deum ut tolleret eum de mundo, quod cum frequenter petiisset, astitit ei angelus dicens: "Missus sum ad petitionem tuam expediendam, elige vel duobus diebus esse in purgatorio vel duobus annis sustinere hanc infirmitatem. ” Ille gaudens elegit primum et mortuus est. Post modicam horam apparuit ei existenti in Purgatorio angelus. Quem videns dixit: "Quis es tu?” respondit: "Ego sum angelus Dei qui te huc adduxi. ” Et ille: "Non es, quia angeli non mentiuntur, et tu promiseras quod per duos dies essem hic, et fui hic per centum annos. ” Tunc angelus: "Scias quod nondum fuisti hic per unam horam, nec adhuc disponitur de sepultura corporis tui. ” Tunc ille: "reduc me, obsecro, ad seculum. ”

Quod cum ille fecisset ex dispensatione divina, iste omnes advenientes movebat ad complementum penitentie eo quod penitentia esset mensa usuraria, ager fecundissimus et mineria ditativa.