Thesaurus Exemplorum
Medii Aevi

Item ad idem. Refert Calixtus papa quod cum .XXX. Lotringi promisissent peregrinacionem beati Jacobi, unus alium non dimitteret nec deficeret, et de hoc sibi invicem fidem dedissent. Cum unus eorum infirmaretur graviter et per . XV. dies eum portassent, aliqui affecti tedio fidem frangentes dimiserunt eum, nec remansit cum eo nisi unus qui se non abstrinxerat juramento. Cum autem de vita infirmi desperaretur eum portasset iste usque ad pedem montis, dum supra eum deduxisset, mortuus est infirmus. Cujus horrorem non valens ferre, iste socius cum esset solus et terra esset periculosa, flendo oravit beatum Jacobum. Qui statim ei apparens in peregrina forma cum equo, requisivit causam fletus. Qui cum expressisset, beatus Jacobus accepit mortuum super equum ante se, et in spatio illius noctis per . XII. dietas eum portavit usque ad montem Gaudii, qui est prope Sanctum Jacobum ad unam leucam. Et precepit canonicis ex parte beati Jacobi ut sepelirent corpus portatum. Tunc dixit beatus Jacobus socio fideli quem super equum retro se portaverat ut diceret sociis suis qui in civitate Longionensi erant ut penitentiam agerent de fide fracta; quia cum peccato nulla peregrinacio placabilis est Deo. Et statim disparuit. Qui ad eos accedens, dum vidissent miraculum egerunt penitentiam de fracta fide.