Thesaurus Exemplorum
Medii Aevi

Nono est virtutum conservativum.

Legitur in Speculo Exemplorum quod dum quedam juvencula virgo maximam devotionem haberet ad verbum Dei, et discurreret de loco ad locum ut audiret sermonem, quidam nobilis attendens ad ejus pulcritudinem sollicitabat eam ad actum corruptum. Que nullomodo acquiescens, dum semel iret per viam eam audiendi sermonem, iste cum equo cucurrit post eam ut eam raperet. Quod illa attendens cum lacrimis Deum rogavit ut per virtutem sui verbi virginitatem suam conservaret. Et statim Deus misit subsidium et vertigo adhesit capiti equi militis, et precipitando eum in aquam submersit. Dum autem ista sermone audito Deum rogaret ut per virtutem sui verbi resuscitaret istum, post paululam horam iste surrexit, et mirabilia de inferno et de utilitate audiendi Verbum Dei enarravit. Unde conversus, licet ignorans esset, continue predicabat et loquebatur de Deo.