(Fr.) Un prêtre de Kreuzau (diocèse de Cologne) qui fréquentait une taverne fut une fois approché par un messager de l’un de ses paroissiens. Celui-ci, au seuil de la mort, demandait la communion. D’abord le prêtre refusa, mais finalement consentit à le faire. Il prit la pyxide avec des hosties et se mit en route. Sur le chemin quelqu’un remarqua que ses mains étaient couvertes de sang. Le prêtre, terrifié, s’examina et ne trouva aucune blessure. Ce qui lui arriva s’explique par Ésaïe 1,15 “car vos mains sont pleines de sang”. Le sang signifie le péché.

De sacerdote de Ouwe, cuius manus apparuerunt sanguinee, cum corpus Christi portaret.

In uilla diœcesis Coloniensis, cuius uocabulum est Ouwe superior, anno preterito, sicut subprior noster per eandem uillam transiens ueraciter intellexit, contigit quod dicturus sum. Sacerdote eiusdem uille, qui adhuc uiuit, sedente in taberna ad potum ceruisie, quedam ex eius parrochianis, cum grauiter infirmaretur, nuntium ei direxit, petens, ut ueniret eamque communicaret. Cui ille respondit: "Uade, non michi modo uacat tempus; postea ueniam". Abiit puer et rediit, dicens infirmam exspectare non posse. Tunc ille surgens intrauit ecclesiam, manus lauit et, pixidem cum sacramento panno inuoluens, ad domum infirme, que trans flumen cui nomen Rura est posita est, tendere cepit. Cumque uenisset circa medium pontis fluminis eiusdem, uir illi occurrens et salutans ait: "Domine, unde est sanguis iste, qui apparet in manibus uestris?" Ille de uerbo rustici satis ammirans, cum ad manus respiceret easque sanguinolentas uideret, pixidem homini tenendam dedit, ipse uero ad aquam descendens manus lauit. Quas cum lotas respiceret, nullum in eis repperit signum incisionis siue lesionis. Pannum etiam reuoluens, cum nullum sanguinis in eo uidisset uestigium, satis admiratus est, quid sanguis in manibus suis apparens portenderet, non intelligens quod Dominus dicit per Ysaiam: 'Manus uestre sanguine plene sunt'. Sanguis peccatum exprimit, secundum quod scriptum est: 'Sanguis sanguinem tetigit'. Sanguis sanguine tangitur, cum praue uoluntati opus malum iungitur. Re uera potatores, concubinarii, adulteri, incestuosi, lusores manus sanguine plenas habent, quibus dum mundissimum corpus Christi tractant et sanguinem et conficiunt, mortis eius se reos efficiunt. Sacerdos uero ad tabernam rediens, quid sibi in uia acciderit, omnibus recitauit.

Si tales Christum in sacramento altaris crederent, puto quod tam misere non uiuerent. Quam periculosum sit, non dico immundis et peccatoribus audacter, sed et bonis negligenter hoc sacramentum tractare, subiunctum declarat exemplum.