(Fr.) En 1226, un prêtre de l’abbaye de Foigny renversa involontairement le calice et le vin consacré se répandit sur le corporal. Le corporal fut lavé, mais quelques temps plus tard on le retrouva couvert de sang. D’abord, le prêtre continua à célébrer sans liquide. Quand il lui fut permis de reprendre la célébration avec du vin, il renversa de nouveau le calice, car il était âgé et avait des mains tremblantes. Pour cette négligence, l’abbaye fut châtiée par un orage terrible. Les moines, ayant peur pour leurs vies, se mirent à chanter 'Salve, regina misericordie' et, grâce à l’intercession de la Vierge, le Christ leur accorda sa grâce. Sa statue tourna du chœur des convers vers le chœur des moines et ouvrit les yeux, et à ce moment précis l’orage cessa.

De plaga in Foni.

Anno presenti, qui est MCCXXVI. ab incarnatione Domini, monachus quidam senex et debilis in Foni, domo ordinis Cysterciensis, die quadam cum missam celebraret, nescio utrum peccatis propriis siue communibus exigentibus, Christi sanguinem super corporale fudit. Quo mox a ministris ad nutum eius sublato, pars liquore infecta uino tribus uicibus abluta est sicque precisa inter reliquias reposita. Non multo post, cum sacrista accederet pannumque casu reuolueret, inuenit totam illam superficiem, que sacramento perfusa fuerat, sic rubere atque madere, acsi recenti sanguine agni intincta fuisset. Postea idem sacerdos sine liquore celebrauit. Cumque data fuisset ei licentia rursum celebrandi, tertia accessit negligentia: iterum fudit calicem. Quam inaudita est plaga subsecuta, et merito. Cum enim abbas et seniores scirent hominem illum esse senem, tremulum ac negligentem et celebrare permitterent, dignum erat, sicut multis usque hodie uidetur, ut, qui indiscreta permissione participauerunt culpe, etiam participes efficerentur uindicte. Nam sexto Kalendas Iunii undecima hora diei grando, turbo ignisque inuoluens tantum terrorem omnibus incussit, ut horam extremi iudicii timerent imminere. Uenti tam ualidissimi excitati sunt, ut pene omnes arbores pomerii uel frangerentur uel radicitus euellerentur. Cumque conuentus timore mortis fugeret in Oratorium, fenestre ui uentorum passim deiecte uix in aliquo loco tutos se esse sinebant; nam ipsa oratorii tecta sunt deiecta. Prior uero specialem habens fiduciam in beata Dei Genitrice, ordinis patrona, ante eius altare cum conuentu se transtulit, clara uoce antiphonam incipiens 'Salue, regina misericordie'. Cumque tanto deuotius, quanto formidolosius illam decantarent, Dei Filius, matris ut creditur precibus placatus, maximum clementie sue signum ostendit; nam ymago crucifixi, que altari conuersorum superposita fuit, ad conuentum se conuertit. Ubi depensum est a monachis, omnes, relicto altari maiori, illuc cucurrerunt, adorantes, procidentes et cum multis lacrimis clamantes: "Saluator mundi, salua nos, perimus". Et ecce! contra naturam picture ymago Dominica cunctis intuentibus oculos clausos aperuit, conuentum respexit et tempestatem in oculorum apertione compescuit, acsi diceret: "En propter matris mee suffragia culpam ignosco". Est enim eadem tabula tanti ponderis, ut uix a sex uel octo uiris portari queat. Preterea lapidi firmiter infixa fuerat. Cumque abbati et monachis, ut sic maneret, placuisset et altera, etiam ymaginem crucifixi habens, eidem a dorso affigeretur, conuersi timentes perpetua confusione notari, ut uerteretur, uix precibus obtinuerunt. Omnium horum que diximus Gisilbertus monachus noster testis est, qui tunc temporis presens fuit. Nos eandem plagam non mediocriter sensimus. Et cum religioso conuentui de Foni eius culpa non sit inponenda, certum tamen est quod propter unam huius negligentiam aliquando prouincia puniatur uniuersa.